नेपालमा एकैदिन १० हजार बढी नमूना परीक्षण, २२४ जना संक्रमित थपिए

काठमाडौं, १६ साउन। नेपालमा पछिल्लो चौबीस घण्टामा २२४ जना कोरोना संक्रमित थपिएका छन्। स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले नियमित प्रेस ब्रिफिङको क्रममा गएको २४ घण्टामा २ सय २४ जनामा नयाँ संक्रमण भेटिएको जानकारी दिएका हुन्।

हाल नेपालमा देशका विभिन्न अस्पताल र आइसोलेशनमा गरी ५ हजार ३ सय १६ सक्रिय संक्रमित बिरामी रहेका छन्। यो अवधिमा एक सय एकाउन्न जना कोरोनामुक्त भएर घर फर्केका छन्। पछिल्लो २४ घण्टामा नेपालमा कुल १० हजार ७ सय ६८ जनाको पीसीआर परीक्षण गरिएको थियो। पहिलोपटक एकैदिन १० हजारभन्दा बढीको संख्यामा परीक्षण गरिएको यो नै पहिलोपटक हो।

नेपालमा कुल संक्रमितको संख्या १९ हजार ७ सय ७१ पुगेको छ। कुल संक्रमितमध्ये हालसम्म ७२ दशमलव ८ प्रतिशत अर्थात् १४ हजार ३ सय ९९ जना कोरोनामुक्त भइसकेका छन्। अहिलेसम्म ५६ जनाको कोरोनाको कारण ज्यान गएको छ।

काठमाडौंमा शुक्रबार ३८ जना कोरोना भाइरस संक्रमित थपिएका छन्। संक्रमण पुष्टि भएकामध्ये काठमाडौंका ३२, ललितपुरका ५ र भक्तपुरका एकजना रहेका छन्। बिहीबार उपत्यकामा ४५ जनामा कोरोना भेटिएको थियो।